चित्रकाव्य

रूप पाहे निरखुनी

जलाशयाच्या दर्पणी

आले आभाळ क्षितिजी

घेई कवेत धरणी

डोंगर कपारी वाहे

मंद मंद गार वारा

उभी राहुनी सलज्ज

पाहे आभाळास धरा

पांघरली निर्झराने

निळी झुळूक बावरी

भाव तरंग उठुनी

धुंद पदन्यास करी

गर्द हिरवी पैठणी

ल्याली सावळी धरा

जलाशयातील बिंब

पाहुनी लाजली जरा

नीलवर्णी  आभाळाचे

रंग ल्याले निर्झराने

भासे जणू निलांबरी

धरणीही या रंगाने

आभाळाचा धरणीशी

ऐसा हा मिलनोत्सव

सारे चराचर पाही

प्रीतीचा हा महोत्सव

रसिका राजीव हिंगे