नमस्कार श्रोते हो,
अपूर्ण ते पूर्ण आणि आर्या वृतात श्री रामायण या दोन्ही ही पुस्तकांचा प्रकाशन सोहळा करण्याचे ठरविले तेव्हा उगाचच माझ्या मनात एक विचार येऊन गेला की जेव्हा या पुस्तकाचे बीज यांच्या मनात रोवले गेले असेल त्यावेळी चित्रगुप्त आणि श्रीविष्णु यांच्यामध्ये काय आणि कोणता संवाद झाला असेल याचे चित्र माझ्या डोळ्यासमोर आले.
भगवान विष्णू क्षीरसागरात शेषावर पहुडले आहेत, लक्ष्मी आहेच पायाशी, तेवढ्यात घाईघाईने चित्रगुप्त श्रीविष्णूच्या दालनात प्रवेश करतात.
"या चित्रगुप्त, आसनस्थ व्हा. कसे आलात?"
"देवा, साधना डोंगरे नी VRS घेतली!"
" माहित आहे आम्हाला, तसचं ठरलं होतं."
"आता काय करेल ? बँके चा वेळ कसा जाईल!"
" आमचा शोध घ्यायला सांगितला आहे आम्ही"
ताडकन चित्रगुप्त आसनावरून उठून उभे राहिले.
"माधवा, हाय टेंपर आहे ती"
"मीच लिहून दिलेले मलाच का ऐकवता आहात तुम्ही चित्रगुप्त.? काळजी नसावी. आम्ही आहोत तिच्याबरोबर. अपूर्णते कडून पूर्णते कडे जायचे आहे ना तिला. सतीश ला आज्ञा केली आहे मदत करण्यासाठी. अन् बाकी आहेतच सगळे प्रोत्साहन द्यायला."
"पण तरी देवा तिची साधना पूर्ण होईल की नाही...
चित्रगुप्ता ला मध्येच थांबवत भगवंत म्हणाले,
"आम्हाला सोबत करावीच लागेल. कारण आमचं स्मरण जे करतात त्यांच्या सोबत आम्ही असतोच हे माहीत आहे की विसरलात तुम्ही?"
"होय देवा, आता तुम्ही सोबत आहे म्हणजेच पूर्ण गवसणारच न!"
एवढे सगळे बोलणे झाल्यावर ही चित्रगुप्त आसनावरून हलले नाही. भगवंत डोळे मिटून पहुडलेले होते.
"काय झालं चित्रगुप्ता? अजून तुम्ही इथेच. काय अडचण आहे आता?"
"केशवा, सुषमा खानापूरकर . तिचं काय देवा. संसार पाशात पुन्हा गुरफटत चालली आहे."
आता मात्र भगवंत ताडकन उठून बसले. चित्रगुप्ता वर आपली नजर रोखून म्हणाले,
"चित्रगुप्ता, आम्ही सगळं तुम्हाला लिहून दिलेले असतं तरीही तुम्हाला या अडचणी येतात कशा?. आमच्याकडे तक्रार घेऊन येण्या आधी किंवा कोणाचे काही विचारण्या आधी त्यांचे बद्दलचे वाचून घेत जा. कळल.?
सुषमा खानापूरकर. कोण समजता तुम्ही तिला. तिची अध्यात्मिक बैठक किती उंचावर आहे माहित आहे न तुम्हाला!"
" मुरलीधरा, वैद्यकीय क्षेत्र ही सोडून दिलं तिने"
" चित्रगुप्ता, आर्या वृत्तात आमचा रामावतार गुंफायला सांगितला आहे आम्ही तिला."
"कठीण आहे देवा, कसं होईल हे लिहून, नातीशी खेळत बसते देवा ती!
"चित्रगुप्त नीट ऐका, तिची सगुण आणि निर्गुण भक्ती दोन्ही आम्हाला भावतात. शिवाय सद्गुरू उभे आहेत पाठीशी. आमचे तसे कामच नाही यासाठी. तरीही
थोडा त्रास घेतला आम्ही म्हणजे असा की साधना मार्फत सूचना द्यावा लागल्या, विदुलाला ही सांगितले सांग बाई तिला काही, नलु साठी आर्या लिहिते तर आमच्यासाठी पण लिही. आम्ही भक्तांसाठी करतो सगळं चित्रगुप्त. शेवटी हे होणार होतेच पण इतरांना ही भार उचलायला लावला थोडा."
" असं होय. तुम्ही असल्यावर काय देवा,कमतरता नाहीच कशाची. आज अपूर्ण ते पूर्ण चा आणि आर्यावृत्तात श्री रामायण या दोन्ही पुस्तकांचा प्रकाशन सोहळा आहे. तुम्ही जाणार असाल च ना तिथे."
"म्हणजे काय? आमची उपस्थिती आहेच तिथे."
" मधुसूदना, एकच विचारतो, भेटले का तुम्ही साधनाला? तुमचा शोध घ्यायला सांगितला होता ते"
" पुस्तकात आमची पूर्तता करून दिली चित्रगुप्ता, पण वास्तवात ती अडकली आहे आर्या, विहान मध्ये."
"देवा, ही कोणती सौंदर्य स्थळं?"
" म्हणून सांगतो आम्ही तुम्हाला नीट लक्ष ठेवा. कर्माचा हिशोब नीट ठेवा. तुमच्या कॉम्प्युटरचे formatting करून घ्या."
"देवा, सगळं व्यवस्थित आहे. मी वाचूनच आलो होतो. पण ते सौंदर्य स्थळे नाही समजली म्हणून आलो होतो विचारायला."
भगवंतांनी आपले नेहमीचे मोहक हास्य केले, अन् चित्रगुप्त ला आज्ञा दिली,
"ठीक आहे. या आता."
ॐ पूर्णमद: पूर्णमिदं पूर्णात्पूर्णमुदच्यते ।
पूर्णस्य पूर्णमादाय पूर्णमेवावशिष्यते ।।
ॐ शान्ति: शान्ति: शान्ति: ।
रसिका राजीव हिंगे
.jpeg)
.jpeg)
.jpeg)
.jpeg)
