#ऋतुगंध
#आषाढ_महोत्सव
आले दाटून नभात
मेघ जांभुळले काळे
नांदी आषाढाची झाली
बघा सृष्टीचे सोहळे।।धृ।।
लखलख सौदामिनी
चमचम प्रकाशली
सरीवरी सरी येती
अन धरणी हर्षली
सावळसा मृदगंध
ठायी ठायी दरवळे
नांदी आषाढाची झाली
बघा सृष्टीचे सोहळे।।1।।
उंडारला दशदिशा
ओलावला गंधवारा
शीत लहर घेऊनी
साद घाली चरचरा
वृक्षवेली झुलवित
जणू बांधिले झोपाळे
नांदी आषाढाची झाली
बघा सृष्टीचे सोहळे।।2।।
जाईजुई पारिजात
महोत्सव सुगंधाचा
करी बेहोष बेधुंद
सहवास साजणाचा
ऐशा धुंदल्या क्षणांना
प्रीत सरी स्पर्शाळे
नांदी आषाढाची झाली
बघा सृष्टीचे सोहळे।।3।।
ऐसा कोसळे पाऊस
झाले स्वच्छ मनांगण
कृष्णसखा भासे जणू
काळे निळे नभांगण
कृष्णमेघ मृदंग हे
राधा वीज रास खेळे
नांदी आषाढाची झाली
बघा सृष्टीचे सोहळे।।4।।
आले दाटून नभात
मेघ जांभुळले काळे
नांदी आषाढाची झाली
बघा सृष्टीचे सोहळे
©®रसिका राजीव हिंगे
