संवाद

शोध घेत चहूकडे
मन ऐसे भिरभिरे
गर्दी किती सभोवती
संवाद ना कोणी करे

सुख क्षण आनंदाचे
कसे कोणास सांगावे
कधी दुःखाचे उमाळे
एकटेच का सोसावे

बहू माध्यमे असती
साधावया संवादासी
परी भासे अपूर्णच
मनातले बोलण्यासी

भेट प्रत्यक्ष घडावी
ऐसे क्वचितच होई
शर्यतीच्या अश्वासम
प्रत्येकच धाव घेई

फिरतसे अव्याहत
कालचक्र गोलाकार
संवादाने प्रकटावे
प्रत्येकाच्या ओठावर

रसिका

दत्त गुरु

हेमंताच्या गारव्यात
पुनवेच्या चांदण्यात
चराचर हे प्रकाशले
शुभ्र दुधी प्रकाशात

शुभंकर मास ऐसा
शुभप्रद तो कार्तिक
जन्म घेतसे भूवरी
दत्तबाळ अलौकीक

रमणीय ती वनश्री
दरी डोंगराचा गाव
संत महात्मे वसती
त्याचे पांगरी हे नाव

आले ऐशा पुण्यक्षेत्री
नरहरी अवतारा
रामचंद्र सरस्वती
घेई  हो दत्तावतारा

निज चरणी आश्रय
संतोषले भक्तजन
भाग्यवंत या जगती
लाभे श्रीगुरुचरण

जगन्नाथा एक करी
आरोग्यता गुरुनाथा
देऊनिया करावे हो
शतायुषी रामनाथा

रसिका

गणपती स्तोत्र भावानुवाद

 ॐ नमस्ते गणपतये।
 त्वमेव प्रत्यक्षं तत्वमसि।।त्वमेव केवलं कर्त्ताऽसि।
त्वमेव केवलं धर्तासि।।त्वमेव केवलं हर्ताऽसि।
त्वमेव सर्वं खल्विदं ब्रह्मासि।।त्वं साक्षादत्मासि नित्यम्।
विश्वव्यापक परमेशा त्रिवार वंदन गणेशा
भालचंद्रा गणाधिशा तुजसी नमन ईशा
सर्वस्व आहेस तूच सर्वत्र तुझा महोत्सव
घडू दे संवाद परस्पर व्हावा नात्यांचा उत्सव
सर्वस्व तूच आहेस का अपमानित नारी
अराजक चहूकडे सांग ना रे या भूवरी
सर्वस्व तूच आहेस व्यास मुनींचा लेखनिक
नांदू दे इथे माणुसकी सृजन व्हावा प्रत्येक

ऋतं वच्मि। सत्यं वच्मि।।2।।अव त्वं मां। अव वक्तारं।
अव श्रोतारं।अवदातारं।अव धातारम अवानूचानमवशिष्यं।
अव पश्चातात्।अवं पुरस्तात् अवोत्तरातात्।अव दक्षिणात्तात्।अव चोर्ध्वात्तात।अवाधरात्तात।
सर्वतो मां पाहिपाहि समंतात्।।3।।
एकदंता गौरी तनया लंबोदरा  शंभुसुता
रिद्धी सिद्धी च्या वरा वंदन तुज शत शता
रक्षणकर्ता तू विश्वाचा रक्षी भारत सैन्यबळ
अबला नसे सबला ती दे शील रक्षण्या आत्मबळ
दश दिशातुनी ये देवा होऊनि गोपालक पुन्हा
रक्षणासाठी धरणीच्या  गजानना ये पुन्हा पुन्हा
गौराईसंगे ये विनायका स्वागतास सारे सजले
आहे त्रिवार सत्य हे रामगुरू रूपे तू रक्षिले

त्वं वाङ्मयस्त्वं चिन्मय: | त्वमानंदमयस्त्वं ब्रह्ममयः ||
त्व सच्चिदानंदाद्द्वितीयोऽसि | त्वं प्रत्यक्षं ब्रह्मासि |
त्वं ज्ञानमयो विज्ञानमयोऽसि || ४||
सिंदूरवदना वक्रतुंडा वरदविनायका सदया
बल्लाळेश्वर गिरीजात्मका गणपती बाप्पा मोरया
अधिराज्य तुझे शब्द सृष्टीवर दे शब्द भांडार , संवादासी।
तू आहे आनंद म्हणूनिया मन हो आनंदघन , सकलांसी।
तू आहेस ब्रह्म  अद्वैताचे सार हे परमेश्वर , सिद्धेश्वर

सर्वं जगदिदं त्वत्तो जायते | सर्वं जगदिदं तत्त्वस्तिष्ठति |
सर्वं जगदिद त्वयि लयमेष्यति | सर्वं जगदिदं त्वयि प्रत्येति |
त्वं भूमिरापोऽनलोऽनिलो नभ:|त्वं चत्वारि वाक्पदानि || ५ ||
जगदोद्धारक गजवक्रा सुखकर्ता जगपालका
तूच निर्मिसी हा पसारा विश्वतारक गिरीजात्मका
रूप तुझे वायू जल अग्नी तूच आहे गगन धरणी
पंचभुतात्मक एकदंता तुझ्या ठायी चारही वाणी
पंचभूतांचे रक्षण व्हावे ऐसी शक्ती दे मोरेश्वरा
वाणी माझी मधुर ठेवी ऐसे दान दे भक्तप्रियकरा

त्वं गुणत्रयातीत:| त्वं देहत्रयातीत: |
त्वं कालत्रयातीत:| त्वं मूलाधारस्थितोऽसि नित्यम्||
त्वं शक्तित्रयात्मक:| त्वां योगिनो ध्यायन्ति नित्यम्|
त्वं ब्रह्मा त्वं विष्णुस्त्वं| रूद्रस्त्वं इंद्रस्त्वं अग्निस्त्वं|
वायुस्त्वं सूर्यंस्त्वं चंद्रमास्त्वं| ब्रह्मभूर्भुवः स्वरोम्||
चराचर तू व्यापून आहे त्रिकालाचा तूच स्वामी
त्रिगुणातीत सर्वात्मकाय तुज नमामी नमामी
शक्तीत्रयात्मक गणेश्वरा योगीजनांच्या ईश्वरा
आत्मबळ वाढविण्यास शक्ती दे गौरीकुमारा
मूलाधार तू सृष्टीचा सृष्टीकर्ता चतुरानन
ओमकारा सृष्टीपालक रुद्राय नमः गजानन
सर्वस्व तुच आहेस तुझी रूपे तिन्ही लोक
रक्ष रक्ष विघ्नराजेंद्रा माझा सुंदर भूलोक

गणादिं पूर्वमुच्चार्य वर्णादिं तदनंतरम् |
अनुस्वार: परतर: |अर्धेंदुलसितम् | तारेण ऋद्धम् |
एतत्तव मनुस्वरूपम् | गकार: पूर्वरूपम् | अकारो मध्यमरूपम् |अनुस्वारश्चान्त्यरूपम् | बिंदुरुत्तररूपम् | नाद: संधानम् | संहिता संधि: | सैषा गणेशविद्या |
गणकऋषि: | निचृद्गायत्रीच्छंद: | गणपतिर्देवता | ॐ गँ गणपतये नम: ||७||
हेरंबा गजवदना सर्व विद्यांचा दाता
ओंकारा स्वरूप देवा तूच भक्तांचा त्राता
 ॐ गँ मंत्राक्षर तव रूप गणकऋषीनी दिला मंत्र
व्याकरणाचा नसे मज गंध तुज ध्यावे, ठावे हेचि तंत्र
ॐ गँ एकाक्षर मंत्राचे तव रूप रिद्धीसिद्धिच्या नाथा
गणेशविद्या म्हणती याला काय हे सांगा गुरुनाथा

एकदंताय विद्महे | वक्रतुंडाय धीमहि |
तन्नो दंती प्रचोदयात् || ८ ||
एकदंता सर्वार्थदाता तव स्मरण ही साधना
ब्रह्मात्मका वक्रतुंडा होऊ दे नित आराधना
ह्या गणेश गायत्रीचे व्हावे मज आकलन
मिळो प्रेरणा भक्तीची राखण्या मन संतुलन

एकदंत चतुर्हस्तं पाशमंकुशधारिणम्। रदं च वरदं च हस्तै र्विभ्राणं मूषक ध्वजम्।।रक्तं लम्बोदरं शूर्पकर्णकं रक्तवाससम्।। रक्त गंधाऽनुलिप्तागं रक्तपुष्पै सुपूजितम्।
भक्तानुकंपिन देवं जगत्कारणम्च्युतम्।। आविर्भूतं च सृष्टयादौ प्रकृतै: पुरुषात्परम।। एवं ध्यायति यो नित्यं स योगी योगिनांवर:।। 9।।

एकदंत आणि चतुर्भुज पाशांकुश आयुध धारक
भग्नदंत वरदमुद्रा हाती रक्तध्वजाकिंत वाहन मूषक
लंबोदरा शूर्पकर्णिका मंगलमूर्ते रक्तवर्णा
रक्तचंदनाचे लेपन रक्तपुष्पे तव पूजना
ऐसे रूप तुझे साजिरे विघ्नहर्ता सृष्टीकारक
प्रकृतीच्या ही पल्याड ऐसा तू वरदविनायक
तो योगियांमध्ये श्रेष्ठ असा गणेश जो ध्याती
ठेवी वरदहस्त शिरी येई क्षणा क्षणा प्रचिती
नमो व्रातपतये | नमो गणपतये | नम: प्रमथपतये | नमस्तेSस्तु लंबोदरायैकदंताय | विघ्ननाशिने शिवसुताय | श्रीवरदमूर्तये नमो नम: || १० ||
देवांच्या देवा गणेशा तुज नमन नमन
शिवगणांचा अधिपती त्रिवार वंदन वंदन
शिवसुताय एकदंता गौरीतनया नमो नमः
विघ्नहर्ता लंबोदरा वरदमूर्ती नमो नमः
सुखकर्ता ऐसा बाप्पा गुरुराजा मी वर्णिला
व्हावा समृद्ध भारत म्हणूनिया मी प्रार्थीला
रसिका(रसिकराज)

शुभ सकाळ

गुरूपीठ परंपरा
चालवीती दत्तगुरु
कुणी म्हणे गजानन
तर कुणी रामगुरू

नरहरी अवतार
क्षेत्र करंज नगरी
हाक देई श्रीपादा
जाऊनिया पिठापुरी

स्थित त्या अक्कलकोटी
स्वामीराज श्रीसमर्थ
दास डोंगरी राहतो
रामदास श्रीसमर्थ

पुण्यधाम गोंदवले
राम राम म्हणे सदा
दत्त वासुदेवानंद
माणगावी वसे सदा

किती पुण्यपदे आहे
किती आहे  ज्ञानमय
भारतीय हिमालय
आहे हो रहस्यमय

वंदनीय विभूतीस
स्मरुनिया करी आज
रामगुरू श्रीचरणा
लीन होई रसराज

शुभ सकाळ
रसिका

शुभ सकाळ

सूर्यबिंब नभांगणी
आभा पसरे केशरी
पूर्व क्षितिज उजळे
पडे प्रकाश भूवरी

आसमंत दरवळे
चैतन्यही झळाळले
शुभ सकाळ जाहली
जीव सारे उत्साहले

मास कार्तिक हा
शारदीय चांदण्याचा
नामजप महायज्ञ
प्रभातीस करण्याचा

शुभ सकाळ
रसिका

दीपावली

मनसागरातील आनंद तरंग
दिसे रंगारंग , सभोताल।
आली दीपावली करू स्वागतास
दिव्यांची आरास , चहूकडे।
सजवावे घर, ऐसे वाटे मना
रंगावली नाना, अंगणात।
परी हा पाऊस अभिषेक धार
धरी धरेवर,  अखंडित।
वरुण करितो आवर्तने किती
भिजली धरती , चिंबचिंब।
थांबव हा चाळा पर्जन्य राजा रे
दिवाळी आली रे, घरोघरी।
येतील घरासी  पाखरे दुरून
घे रे सांभाळून, वाटेवरी।
माहेरासी सुखे नववधू येति
भ्रतारा संगती, आनंदाने।
म्हणुनी विनंती  सकल करिती
आता घे विश्रांती, क्षणभर।

दिवाळी शुभेच्छा

घरदार  छान छान
कसे कोण सजविती
हात फिरे घरावरी
गुज करिती ह्या भिंती

स्वच्छ आणि प्रसन्नता
वास करी लक्ष्मी तिथे
सांगे पुराण वेद ही
ऐश्वर्याची खाण तिथे

लखलख प्रकाश हा
जणू चांदणे चंदेरी
चंद्रासह रोहिणी ही
जशी आली या भूवरी

उत्साहाला ये उधाण
घरोघरी रोषणाई
आली आली दीपावली
स्वागताची झाली घाई

दिवाळीचा आपणास
देते शुभेच्छांचा साज
घ्यावा लेऊनी आपण
विनवीते रसिकराज

रसिका

हिंदू परंपरा

हिंदू परंपरा
रक्षती संस्कृती
आकारा आकृती, सृजनाची।
सण समारंभ
हे विज्ञाननिष्ठ,
पूर्वज ही श्रेष्ठ, ऋषीमुनी।
श्रद्धा ठायी ठायी
उत्साह अमाप
नसे मोजमाप, परस्परा।
ऐसा सण मोठा
दिव्यांचा उत्सव
होई महोत्सव, दीपावली।
पर्जन्य राजा ही
मनी सुखावला
आला पहायला, भूवरी या।
लखलख दिवे
पाहुनी हर्षला
सुखे हुंदाडला, सृष्टीवरी।
माझ्या भारताची
ऐसी ही संस्कृती
सारे सामावती, चराचरी।

ढग

शुभ्र पुंजका ढगांचा

निळ्या नभी विहरतो

मन बावरे धावते

सुख क्षण आठवतो।

चालतांना दिसे छान

ऐट त्याची असे न्यारी

जणू शाल ही धुक्याची

वाटे घेई अंगावरी।

शारदीय महोत्सवी

धुके घेऊनि येतसे

दवबिंदू हे चंदेरी

रुप तयाचे होतसे।

कधी भरुनी जलद

दिसतसे जांभुळला

विरहिणी सवे गुज

सांगे श्रावण ग आला।

कधी चंद्रास झाकोनी

मिलनाची साक्ष देई

अति खोडकर ढग

चांदणेही त्याचे होई।

रसिका

शुभ सकाळ

रोज नित्य नियमाने
उगवसी प्रभाकरा
तव किरण स्पर्शाने
तेजाळसी चराचरा

ऐसे नित्य नियमाने
घडू दे नामस्मरण
रामगुरू चरणांचे
व्हावे रोजच दर्शन

ऐसी कृपा मजवरी
रामदत्ता करावी हो
ध्यास नामस्मरणाचा
नित्य मज लागावा हो

उंच उंच गिरीनारी
जावे वाटे तीर्थक्षेत्री
तव कृपेच्या संगती
दर्शनासी पुण्यक्षेत्री

रसिका