कात्यायनी

 

हे भगवती कात्यायनी

कल्याणी मातृरूपिणी

शुभंकर रूप तेजाळे

तुज नमो नमः भमिनी

ब्रह्मा विष्णू महेशाचे

तेजातुनी तू प्रगटसी

महर्षी कात्यायनी गे

प्रथम तुज आराधिती

ऐसे लाभे नामाभिधान

जगदंबे तुज कात्यायनी

अत्याचारास सारुनिया

वधिला महिषासुर रणी

कुमारिकांची आराध्या

इच्छित वर प्रदायिनी

चारी पुरुषार्थाची प्राप्ती

सहज लाभे तव चरणी

अराजक पुन्हा माजले

तुजसम देई आत्मबळ

आत्मरूपी एकरूपता

दे निवाराया सारे खळ

शुभ सकाळ

रसिका राजीव हिंगे