अबोला

धरलाय अबोला पुस्तकांनी
कितीतरी दिवस झाले आता
पहात पण नाही माझ्याकडे
किती विनविते बोला आता

टाळेबंदी आहे म्हणूनच
केलीस ना माझ्याशी गट्टी
ऐसे रागाने बोलून बोलून
घेतलीच पुस्तकांनी मग कट्टी

पुस्तकांचा हा अबोला मला
फारच सारखा छळतो आहे
वेळ कोणी देईल का उसना
वेळे  अभावी हे सारे  आहे

सरीवर सरी याव्या ज्ञानाच्या
विहरावे याच्या अक्षर मळ्यात
असे स्वप्न रंगवत जाते मी
अबोला सोड धर माझी संगत

रसिका राजीव हिंगे