चित्र काव्य

वाटेवरी या निर्जन
काय देऊ तुला बाळे
रूप तुझे आरस्पानी
कुठे लपवू न कळे

काय म्हणू तुज बाळे
नभातील तू चांदणी
सांग मला तू राजसी
सौंदर्याची आहे खाणी

आहे का ग तू विश्वाची
जन्मदात्री नि निर्माती
हास्य तुझ्या ऐसे गाली
कुंद कळ्याही लाजती

भावपूर्ण निरागस
डोळे तुझे ग टपोरे
मुख चंद्रमा तेजस्वी
हरवून गेलो सारे

नच तू कोणाचीच ग
माझी आहेस सावली
चंद्र न तारका नसे
फक्त बाबांची लाडली

रसिका राजीव हिंगे