पहाट

सुशांत वेळ ही पहाटेची
पूर्व क्षितिजी केशर दरवळ
सलज्ज धरा उभी स्वागतास
मोहरली चराचरी हिरवळ

रविराज रथात बैसोनिया
शिंपण तेजाचे करीतसे
बहरली पानफुलांनी धरा
अमृत सिंचन स्वीकारतसे

अवगुंठन ऐसे धरणीचे
तेजाचे नि गंधाळलेले
पारिजात होई प्रहर प्रहर
क्षणक्षण येति आनंदलेले

ऐशा प्रसन्न पहाटवेळी
नामस्मरणाचा व्हावा नाद
दत्त दिगंबर दत्त दिगंबर
गुरुराजास घालावी साद

स्मर्तृगामी सद्गुरुनाथ
दत्तात्रेया रामगुरूराज
ध्यास लागो रामनामाचा
हेचि  इच्छिते रसिकराज

शुभ सकाळ
रसिका