विदुषक/सर्कस

आला आला विदुषक
सर्कशीच्या रिंगणात
कोण कोण बरोबर
दिसे विविध रंगात

धडपडे खोटा खोटा
डोळे फिरे गरागरा
उड्या मारी टुनटुन
पहा चाले भराभरा

नाकावर शेंडा लाल
टोपीचाही गोंडा छान
वेशभूषा ती विचित्र
मधुनच घेई तान

चेष्टा नाना करुनिया
हसवितो बाळे सान
रंगवून चेहऱ्याला
दुःख लपवी महान

सर्कशीत प्राण्यांसवे
जीवघेणे ऐसा खेळे
घरी कारभारीण ती
पाहे वाटुली हो बाळे

रसिका राजीव हिंगे