मन बावरे हळवे झाले
मेघ सावळे पुन्हा एकदा नभी दाटले
तुझ्या आठवात मन बावरे हळवे झाले ll धृ ll
क्षणात येई गिरकी घेउन निळसर वारा
आठवणींच्या हिंदोळ्यावर झुले शहारा
अशीच होती सोबत सजणा मज आठवले
तुझ्या आठवात मन बावरे हळवे झाले ll 1 ll
सर कोसळते मोतीयांचा लेऊन साज
या बिजलीचा गगनी भरला किती आवाज
कसे आवरू सांगना अता क्षण भिजलेले
तुझ्या आठवात मन बावरे हळवे झाले ll 2 ll
डोंगर झाडे चिंब जाहली धरा सावळी
कुणी वाजवी सुरेल पावा कातरवेळी
कसे साठवू रुप सृष्टीचे मंतरलेले
तुझ्या आठवात मन बावरे हळवे झाले ll 3 ll
रसिका राजीव हिंगे
No comments:
Post a Comment