रंग बावरे फुलून आले

 रंग बावरे फुलून आले

मनास होता सावळ बाधा नभी चांदणे बहरुन आले

कालिंदीच्या तीरावरती रंग बावरे फुलून आले llधृll

फेर धरूनी रास खेळते अवतीभवती रूप सावळे 

टिपरीवरती ताल धरूनी पावा छेडी सुर आगळे 

मृदुंगाचा नाद जागला पैंजण पाउल पुन्हा थिरकले

कालिंदीच्या तीरावरती रंग बावरे फुलून आले ll1ll

भुरभुरणारा मुजोर वारा अंगलट येइ शेला उधळत

भाळावरती विसावले गे कुरळे कुंतल उगाच नाचत

घर्म बिंदू ते स्पर्शावया गोऱ्या गाली हर्षत आले

कालिंदीच्या तीरावरती रंग बावरे फुलून आले ll2ll

कृष्णसख्याचे मानस पूजन सखे मांडले काठावरती

त्या यमुनेच्या डोहा समती तरंग उठती मनावरती

परमात्म्याचे दर्शन व्हावे अंतःकरणी भाव जागले 

कालिंदीच्या तीरावरती रंग बावरे फुलून आले ll3ll

रसिका राजीव हिंगे 

rasraj#रंग बावरे#,कृष्ण सखा#