पाहुणी/अतिथी
आली लेक घरी आज
होऊनिया ग पाहुणी
किती दाटले आभाळ
काय भरले या मनी
भरविले काल तिला
काऊ चिऊ चे घास ग
गिरविला श्रीगणेशा
वाटतात हे भास ग
खेळ सवंगडी तिचे
सारे रमले जीवनी
आली लेक घरी आज
होऊनिया ग पाहुणी
पैंजणांची छमछम
चिमुकल्या पावलात
नाद घुमतो मंजुळ
तिच्या सुखी संसारात
अशी बहरली वेल
घाले नभा गवसणी
आली लेक घरी आज
होऊनिया ग पाहुणी
तिचे मोठे होणे जीवा
हुरहूर लावीतसे
जाण जबाबदारीची
सारे तिला कळतसे
सौभाग्याचे लेणे ऐसे
रोज सुखाची कहाणी
आली लेक घरी आज
होऊनिया ग पाहुणी
आली लेक घरी आज
होऊनिया ग पाहुणी
किती दाटले आभाळ
काय भरले या मनी
रसिका राजीव हिंगे
No comments:
Post a Comment