मातृदिना निमित्ताने

 

तुला स्मरतांना आज

बालपण आठवे ग

तुझी मूर्त पुढे येई

आई मला आकळे ग

तुझे संस्कारांचे देणे

तेव्हा नव्हते कळत

येई प्रचिती मजला

आज प्रत्येक क्षणात

तुझे बोलणे वागणे

आज आठवे सारे ग

तुझी मूर्त पुढे येई

आई  मला आकळे ग

आई झाले असतांना

कसे जगावे जीवनी

तूच आहेस आदर्श

दुजा नसे ग कोणी

मीच मजला सांगते

तुझी थोरवी काय ग

तुझी मूर्त पुढे येई

आई मला आकळे ग

तुझे वाचन संस्कार

घडवीत गेले मला

तुझ्या प्रतिभेचा वसा

पुढे चालवू दे मला

सारे करिती वाहवा

कौतुकास तू नसे ग

तुझी मूर्त पुढे येई

आई मला आकळे ग

तुला स्मरतांना आज

बालपण आठवे ग

तुझी मूर्त पुढे येई

आई मला आकळे ग

रसिका राजीव हिंगे