शब्दांच्या वाटेवरती
मळा अक्षरांचा गवसे
कुण्या पांथस्थाची ही
शिदोरी नकळत दिसे
थंडीने लपेटून घ्यावी
शाल पांढुरकी जैसी
तैसे शब्द बिलगले
वासरा गाय भेटे जैसी
ऊन पांघरुनी आले
शब्द शब्द वाटेवरी
तेज सांभाळीत सूर्य
येई पूर्व क्षितिजावरी
हलकेच शीळ वाऱ्याची
कानी गुणगुणू लागली
शब्द परडी सुगंधित
हळूच उधळून गेली
वाट मखमली झाली
वरुण राजा भेटताच
पापणकाठ ओलावले
आठवात शब्दांच्याच
शब्दांच्या या वाटेवरती
भाव शब्द भरून आले
मोत्यास लाभे कोंदण
तैसे भावनेस लाभले
पांथस्थ हो भावविभोर
उचलता शब्दशिदोरी
शब्द वाट वारसा देई
आनंदवन गे अंतरी
रसिका राजीव हिंगे
No comments:
Post a Comment