पाखरे
किलबिल पाखरांची
चिवचिव करिती ग
सांगतात एकमेका
झाला रामप्रहर ग
निघे लगबग थवा
घेई झेप आकाशात
चित्त पिलापाशी राही
निजलेले घरट्यात
पिलासाठी चारा आणी
पाण्यासाठी शोधे माडी
बांधण्यास घरटे ते
घेई गवताची काडी
थकलेले पाखरू ग
येई पुन्हा घरट्यात
भरविती पिलास ग
चारापाणी आनंदात
सांजवेळी झाडावर
पुन्हा होती सारे गोळा
फांदी फांदीवर भरे
जणू पाखरांची शाळा
रसिका राजीव हिंगे
No comments:
Post a Comment