सरीवर सरी आल्या
चिंब भिजली धरणी
हे दिवस पावसाचे
आला पाऊस अंगणी
हे दिवस पावसाचे
चिंब चिंब भिजायचे
क्षण क्षण आठवांची
साठवण करायचे
उर भरून येतो ग
अश्रू दाटले नयनी
हे दिवस पावसाचे
आला पाऊस अंगणी
कोसळतो पाऊस हा
सोसाट्याच्या वाऱ्यासवे
नेतो वाहून सारेच
साचलेले पाण्यासवे
नदी नाले ओसंडले
वाहे दुथडी भरुनी
हे दिवस पावसाचे
आला पाऊस अंगणी
श्रावणात पावसाचे
रूप आगळे वेगळे
हळदुले ऊन कधी
कधी मेघ जांभुळले
कधी सरसर धारा
इंद्रधनू नभांगणी
हे दिवस पावसाचे
आला पाऊस अंगणी
रिमझिम बरसत
येती आषाढाच्या सरी
भक्तिभाव जागवीत
धावतात धरेवरी
शमविती तृषार्त ही
माय माझी धरणी
हे दिवस पावसाचे
आला पाऊस अंगणी
सरीवर सरी आल्या
चिंब भिजली धरणी
हे दिवस पावसाचे
आला पाऊस अंगणी
रसिका राजीव हिंगे
No comments:
Post a Comment