नभांगणी चांदणे फुलावे
रजनीने चंद्रकळा ल्यावी
अन चंद्राने गगनी यावे
रातराणी ही गंधळावी
अन्
अशीच आपुली भेट घडावी
जांभुळल्या मेघांची या
सर हळूच बरसून जावी
गंधित सावळ्या भूवरी
स्वप्ने सुखाचीच पहावी
अन्
अशीच आपुली भेट घडावी
निळ्याशार या आकाशात
जलदांची दाटी व्हावी
सरसर यावी संततधार
सृष्टी सारी हरखून जावी
अन्
अशीच आपुली भेट घडावी
हिरवाईचा लेऊनी शालू
धरा अशी नटूनी यावी
चराचरी हो आनंदवन
चैतन्याला जाग यावी
अन्
अशीच आपुली भेट घडावी
आषाढाची मोहक सर ती
सानथोरा भिजवुनी जावी
विठुचा गजर जागवीत
पंढरपुरची वारी यावी
अन्
अशीच आपुली भेट घडावी
©️रसिका
No comments:
Post a Comment