चंद्र पौर्णिमेचा हसला गाली
गंधाळली रात्र काळी चंद्रकळा ल्याली
अन् हा चंद्र पौर्णिमेचा हसला गाली
चांदण्यांचे सडे शिंपिले तारकांनी
रेखिली रंगावली सुरेख नक्षत्रांनी
अवकाशीची फुले पाहुनी धवलाली
अन् हा चंद्र पौर्णिमेचा हसला गाली
निळ्या सागरी अवखळ लाटा उचंबळती
पूर्णत्वाचे रुप पाहुनी ये त्यास भरती
लाज बावरी लाट सागरी गे मोहरली
अन् हा चंद्र पौर्णिमेचा हसला गाली
चंद्रा समती प्रीत बावरी सखी साजणी
रूप लाजरे अधर बोलके लावण्यखणी
अबोल त्याच्या स्पर्शातून चढली लाली
अन् हा चंद्र पौर्णिमेचा हसला गाली
रसिका राजीव हिंगे
No comments:
Post a Comment