किती सांभाळू सांग
मोह मायेचा मनोरा
षडरिपूचा हा पसारा
वाटे सुखांचा डोलारा
रातराणीचा मंद धुंद सुगंध, वाऱ्याची हलकीशी निळसर झुळूक, नभी पौर्णिमेचा चंद्र, आणि सागराला आलेली भरती. त्याच्या फेसाळत किनाऱ्याकडे धाव घेणाऱ्या लाटा अन् पुन्हा त्याच्यातच विलीन होणाऱ्या. सतत निसर्गाचे हे चक्र असेच फिरत राहील. ऋतुमागुन ऋतू येतील, स्वतः जवळचे देणे देऊन पुन्हा नव्याने बहरतील. समर्पण! जे आहे ते देत राहणे एवढंच त्याला ठाऊक. हाच त्याचा वास्तवातला आणि कल्पनेतल्या सुखाचा डोलारा.
पण मायेच्या आवरणाखाली किती अज्ञानी होऊन जगत असतो प्रत्येक जीव. जन्मापासून कोहं विचारणारा जीव या आभासी जगात आल्याबरोबर सुखाच्या मागे धावत असतो.
वास्तविक पाहता खरं सुख म्हणजे काय हे देखील कळत नसतं, तरीही सुखाचे इमले बांधण्यात मश्गूल असतो. स्वतःला जे रुचेल,भावेल तेच सुख आहे असे मानणारा मनुष्य प्राणी. मग त्यासाठी काही चुकीचे घडते आहे का, कुणाला त्रास होतो आहे का याचा विचार देखील मनात येत नाही.अन् याच आभासी सुखाचे डोलारे मानव उभे करत असतो.
कल्पनेच्या दुनियेत, स्वप्नांच्या हिंदोळ्यावर झुलत प्रत्येक जण जगत असतो हे निर्विवाद सत्य असले तरी स्वतःच्या सुखासाठी फुलण्या आधीच एखादी कळी तर कुस्करली जातं नाही न! सुखाच्या मागे इतके धावत रहातात की मायेची ऊब मिळावी म्हणून तिष्ठत असलेला लहानगा, अर्धवट वयाचा, स्वप्नांच्या दुनियेत ज्याने जगावे असा कंटाळून आयुष्य तर संपवत नाही न! विचार करण्याची शक्ती नष्ट होतं असेल तर अशा सुखाच्या कल्पना का कराव्यात. कधी कधी त्या परमात्म्याला विचारावेसे वाटते, तूच देतोस ना सगळं, मग अशा कल्पनेचे मनोरे कसे नीट उभे असतात. विचार तूच देतो, शक्ती तूच देतो, जन्म तूच देतो, तुझाच हा सगळा पसारा. पारिजातकाच्या मनगंध पायघड्या तूच घालतोस, रानी वनी फुलांचा पसारा आणि मनात विचारांचा पसारा तूच करतोस, तरी पण असे का. हेच जर सुख असेल तर दुःख कोणते.
जशा किनाऱ्याला मोहवणाऱ्या लाटा आहेत तशाच भवसागर पार करण्यासाठी सद्विचारांच्या लाटा निर्माण व्हाव्यात, सुगंधित फुलांनी चराचर दरवळत आहे तसेच माझे आयुष्य दरवळून टाकणारा कल्पवृक्ष हवा आहे.हा खरा माझ्या कल्पनेतल्या सुखांचा डोलारा जो मला चिरंतन उभा ठेवायचा आहे. हे ईश्वरा तुला अशक्य नाही रे असे करणे कारण तूच तर निर्माता आहेस. तुझीच माया आहे ही सारी. खरे आहे न!
©️रसिका राजीव हिंगे
rasraj#सुख#डोलारा#कल्पना#
No comments:
Post a Comment