पायवाट

 पायवाट

नागमोडी वळणाची
वाट कुठे धावतसे
रान वारा सवे घेत
कुठे गडप होतसे

विसावते वळणाशी
जरा वळून बघते
पुन्हा अखंड प्रवास
घेत गिरक्या चालते

क्षण सौख्याचे भेटता
आनंदाने ही नाचते
वळतांना थांब्यावरी
मनोमनी ही हासते

मेघ दाटती सावळे
सरसर बरसती
निसरडी होते कधी
घसरण ही क्षणांती

घनदाट झाडातुनी
धरी पदर सावली
ममतेने कुरवाळी
भासे ही गुरू माऊली

ठायी ठायी जगतांना
रोज सुंदर पहाट
साथ देई क्षणोक्षणी
जीवनाची पायवाट

रसिका राजीव हिंगे