जीवनाच्या वाटेवरी
जाणीवांच्या पायघड्या
दान मिळे कर्तृत्वाचे
जीवनाच्या वाटेवरी
दीपस्तंभ पूर्वजांचे
नागमोडी वळणाची
जीवनाची पायवाट
अनुभव सिद्ध होता
नवी उजाडे पहाट
ठायी ठायी विखुरली
मोतीयांची रास जणू
जीवनाच्या वाटेवरी
भेटे प्रकाशाचा कणू
काळोखात हरवते
धुके पांढुरके कधी
जीवनाच्या वाटेवरी
समृद्धीचे मेघ कधी
कधी असते ही वाट
मखमली मऊशार
जीवनाच्या वाटेवरी
कधी काटे टोकदार
हात घेऊनि हातात
नाते सांभाळत जावे
जीवनाच्या वाटेवरी
क्षण आनंदाचे यावे
हाक दुःखाची येताच
साद सुखाची घालावी
जीवनाच्या वाटेवरी
एकमेका साथ द्यावी
रसिका राजीव हिंगे
No comments:
Post a Comment