माझेच गीत मी उलगडले
सृष्टीचे हे सर्द सावळे
रूप पाहता मन गहिवरले
जांभुळले मेघ बरसतांना
माझेच गीत मी उलगडले
मृग नक्षत्र भिजवी धरणी
नभी जलद हे गडगडले
सौदामिनी करी लखलख
अन शब्दप्रभु मला गवसले
पदन्यास तो जलधारांचा
तांडव करी अवखळ वारा
माझेच गीत मी उलगडले
पाहता हा सृष्टीचा पसारा
ऐक ना रे पर्जन्य राजा
बरसावे फक्त मेघातुनी
गीत मज कसे उलगडावे
आलास जर नयनामधुनी
रसिका राजीव हिंगे
No comments:
Post a Comment