विषय - शोषण
जीवनात जगतांना
जिथे न कळे पोषण
अलवार भावनेचे
होई तिथेच शोषण
बाल असो वा यौवन
अर्थ न कळे तयांसी
चीज काय हे शोषण
ठावे नच सकलांसी
माय बाप हतबल
कैसे करावे पालन
अलवार भावनेचे
होई तिथेच शोषण
दारिद्रय़ाने गांजलेल्या
तया इतकेच कळे
भरावया खळगीस
लागतात हो जोंधळे
वीतभर पोटासाठी
करीतसे वणवण
अलवार भावनेचे
होई तिथेच शोषण
हक्क जणू श्रीमंतीचा
गंधफुलें कुस्करीचा
माजलेल्या धनाड्यांचा
छंद नवा मस्करीचा
धुंदलेल्या वळूस या
कोण घालील वेसण
अलवार भावनेचे
होई तिथेच शोषण
वेशीवरी टांगलेली
आयुष्याची लक्तरे
भाव भावनांचा खेळ
मूकपणे जगतो रे
माणुसकी मानवता
भासे सारी चणचण
अलवार भावनेचे
होई तिथेच शोषण
No comments:
Post a Comment