पारिजात

 

उतरुन आल्या नभी चांदण्या

प्रतिबिंब जणू भासे भूवरी

केशर चांदण फुलवित हसले

सावळे रूप सखा श्रीहरी

रुक्मिणीच्या गंध ओंजळी

गंधित प्रीती भामेचीही

केशर लाली ठायी ठायी

गाली भासे धरणीच्याही

गंधभारले आंदण ऐसे 

देउनी परी नामनिराळा

पारिजातकी शुभ्र पांढरा

तयात दिसतो कृष्ण सावळा

सुगंधाची भरली परडी

समर्पणाचे भाग्य लाभले

दरवळलेले अंगण माझे

कृष्णचरणी मन विसावले

रसिका राजीव हिंगे