चित्रकाव्य

काय शोधिसी चौकटीतले

काय हरवले तुझे सांग ना

भय नच ठावे उंचावरती

काय गवसले जरा सांग ना

काऊ चिऊ सवे खेळता

शिकवण देते कोमल ममता

शौर्याची ती गाथा प्रसवेल

बालपण असे जपता जपता

आनंदाच्या सोपानावर

वात्सल्याचे गाव लागते

सरसर उंची गाठत गाठत  

हवेहवेसे गवसत जाते

प्रयत्नांतीच मिळेल मेवा

चौकट मोडून ये बाहेरी

यशोशिखर तुज खुणवत आहे

पण संस्कृतीस जप परोपरी

©रसिका राजीव हिंगे