चित्रकाव्य

 

काय सांगू नवलाई

माझ्या मराठी मातीची

बहू रत्नांची निर्माती

माय साऱ्या संस्कृतीची

मांदियाळी संतांची गे

येई इथेच जन्मास

शौर्य नि पराक्रमाचा

रुजे इथे इतिहास

सालंकृत झाली भूमी

गड किल्ले कपारींनी

गोदा, चंद्रभागा तीर्थे

पापे सारे प्रक्षाळणी

सह्याद्रीच्या सावलीत

महाराष्ट्र सुरक्षित

आर्थिकाच्या सिंहासनी

विराजतो माझा प्रांत

जरीपटक्याचा डौल

ऐसी गौरवाची गाथा

तुज त्रिवार मुजरा

तव चरणी हा माथा

 

रसिका राजीव हिंगे