सुगंधाचे लेणे

#rasraj #वसंत#काटेसावर #

पाचोळ्याचे पैंजण नादत शिशिर भिरभिरे चराचरी

आला आला वसंत आला चाहूल देत वेशीवरी ll धृ ll 

सुवर्ण चंपक गंध भारला सुखावतो गे मनोमनी

काटेसावर पळस लालसर फुलून आले रानीवनी

सौंदर्याची उधळण करतो रंग दाटसा गुलमोहरी

आला आला वसंत आला चाहूल देत वेशीवरी ll 1 ll 

आम्रतरुंचा मोहर गंधित ठायी ठायी दरवळला

मंद गारवा उनाड वारा शीळ वाजवित भरारला

धुंद मोगरा अत्तर उडवित विहरे सावळ धरेवरी

आला आला वसंत आला चाहूल देत वेशीवरी ll 2 ll 

रसिका राजीव हिंगे