स्वप्न सत्यात येता

 

संध्याराणी फुलवत आली

स्वप्न मनीचे देख साजणा
प्रितीच्या या दरबारी गडे
कशी सावरू लाज सांग ना

गुलाब फुलले रानी वनी
रंग मेंदीचा हातावरती
जणू प्रीतीची लाली चढली
अवखळ या गालावरती

साक्षीदार बघ आला नभी
काळोखाचा पटल सारूनी
अवगुंठन शीतलतेचे
चराचरा देई पांघरुणी

असेच घडते क्षितिजासी
अंबर धरणीचे मिलनी
प्रणयाला येतसे भरती
उचंबळे सागर गगनी

स्वप्न सत्यात येता उमजे
जगण्याचे हे सारे बहाणे
याच साठी असे अट्टहास
गावे नवीन प्रीत तराणे

रसिका राजीव हिंगे
16.02.2022