संवाद

शोध घेत चहूकडे
मन ऐसे भिरभिरे
गर्दी किती सभोवती
संवाद ना कोणी करे

सुख क्षण आनंदाचे
कसे कोणास सांगावे
कधी दुःखाचे उमाळे
एकटेच का सोसावे

बहू माध्यमे असती
साधावया संवादासी
परी भासे अपूर्णच
मनातले बोलण्यासी

भेट प्रत्यक्ष घडावी
ऐसे क्वचितच होई
शर्यतीच्या अश्वासम
प्रत्येकच धाव घेई

फिरतसे अव्याहत
कालचक्र गोलाकार
संवादाने प्रकटावे
प्रत्येकाच्या ओठावर

रसिका