आनंदाचे डोही 

अर्थ स्वरूपाचा 

स्वप्न नगरीत सापडेल का डोह वाहता आनंदाचा

फिरुनी येऊ गंधर्व नगर दिसेल का मज गाव सुखाचा

जिकडे तिकडे आरसपाणी सौंदर्यांची मुक्त उधळण 

परी कळेना भय कोणाचे श्रद्धेचेही दिसे विस्मरण

होते नांदत काम क्रोध मोह तिथे सर्वत्र  मिळून सारे 

माझे माझे मी पणाचेच उभारलेले उंच मनोरे

विसरुन सारे धावत सुटले ओळखीचे न दिसले मजला

हताश होउनि पाहू लागले चहुकडे ग ज्याला त्याला

अकस्मात मग धावत आले श्रीगुरु मज भेटायासी

बाळे कुठे भरकटली तू आलीस काय बघावयासी 

जग हे सारे मिथ्या आहे ध्यास घेइ तू नित्यत्वाचा

तुझ्या अंतरी भरला बाळा डोह खळाळत आनंदाचा

काय कळेना श्रीगुरुराया तूच आधार या जगताचा

सान लेकरू तुमचे नाथा अर्थ कळू दे या स्वरुपाचा 

रसिका राजीव हिंगे